Breast Cancer
Support Group
E trabou di
Mary Joan Foundation
den nos comunidad
Mary Joan Foundation a wordo funda na ana 2007 na memoria di Mary Joan Geerman, un senora cu durante ocho ana a hiba e lucha contra e malesa di cancer na pecho. Mary Joan a hiba un bataya fuerte, no solamente pa haya sanacion pero tambe el a guia otronan y tabata un inspiracion pa hopi hende. El a conscientisa otronan con pa carga e peso di nan cruz hunto cu nan sernan keri. E kier a kibra e taboe den nos comunidad cu hende ta sconde nan malesa. Ta algun hende rond di e patient so sa di e malesa. E ideal di Mary Joan tabata cu ningun persona ta sufri di cancer di pecho, mester pasa den e trayectoria doloroso su so. E persona mester por conta cu guia y apoyo di famia y otro instancianan pa hiba un bida di calidad. Mary Joan a fayece na 2002 na edad di cuarenta ana.
Bo nunca ta bo so,
Nos tey pabo!
Nos meta como fundacion ta
duna guia y ayudo na hende muhe y hende homber cu tin cancer na pecho. E trayectoria di yudansa ta for di momento cu a constata e malesa. E ayudo ta den forma psicosocial. Esey ta encera duna conseho, organisa charla y actividadnan. Un cliente di MJF ta bini na remarca pa ayudo di un trahado social of psicologo sin cu e mester paga pa e servicio aki.
MJF ta profila su mes como cuido di 'eerste lijn'; esta convence e persona pa bishita su dokter. Hopi hende no kier bay dokter ora nan sinti algo na nan pecho. E barera ta grandi algun biaha. Un bishita na dokter por determina si en berdad e ta malo. MJF ta sigui guia e persona den henter e fase di su malesa y ta envolve otro instancianan manera Fundacion BOB pa sondeo di pecho, Mama Poli na hospital pa e proceso di tratamento medico na hospital, Koningin Wilhelmina Kankerfonds pa e parti di material, Fundacion pa Nos Comunidad pa ayudo di cuminda y Edmund Harms Foundation den casonan terminal. MJF por conta tambe cu un grupo di boluntario cu ta brinda e guia spiritual na un patient y su famia, specialmente ora e persona ta den fase terminal.
MJF ta duna ayudo na e patient, su famia y den hopi caso tambe na pia di trabou. Pasobra ta hopi importante pa e coleganan di un persona malo por sa con pa atende cu e caso. Pero esaki mester sosode cu permiso di e cliente.
Cancer di pecho
no tin Genero. Edad.
Hende Homber tambe por haye
Apesar cu no ta papia hopi di dje, pero Aruba conoce casonan di cancer na pecho cerce hende homber. Y esaki ta otro taboe cu nos comunidad mester purba kibra. E hende homber cu cancer na pecho cu bini na MJF hopi biaha ta laat caba pa e haya un bon guia. Pesey mes ta pidi tanto e hende homber como e hende muhe cu asina bo sinti algo na bo pecho, acudi na bo dokter di cas of na MJF pa algun conseho. MJF ta bay dedica mas atencion na duna charla na scol, pasobra tin indicacion cu e edad cu un persona por haya cancer na pecho ta baha. Tin caso di hoben di diesocho ana cu e malesa. Sin duda motibo pa preocupacion de nos comunidad. Ta imporatne informa tur hende cu si nan haci nan propio saminacion, esaki por yuda preveni un malesa mas grave. No solamente pa e parti medico, pero tambe pa e parti psicosocial.
MJF tin 279 cliente registra, di cual nobenta (90) ta patientnan cu ta haya tratamento medico etc. E edad ta varia entre diesocho pa ochenta ana. Den caso di esnan cu a sobrevivi e malesa, MJF ta sigui mantene contacto cu nan.
Yudando pa mas di
un decada
den nos communidad
Con Mary Joan Foundation ta yega na su fondonan?
For di gobierno ta haya un subsidio anual pa nos proyectonan, e collect anual cu ayudo di nos boluntarionan, un caminata cu ta sirbi tambe como conscientisacion di comunidad y diferente donacion di comercio etc. Na 2018 MJF a cuminsa cu su mesun tayer pa traha peluca pa e clientenan. Pa haci e trabou aki, nan ta conta cu donacion di cabey for di comunidad. E demanda ta grandi, pero semper tin peluca disponibel. E persona ta haya e peluca completamente gratis pa e uza y no mester debolb'e. Algun ta scoge pa ora nan muri, pa nan bay dera cu e peluca. E retonan mas grandi cu tin actualmente ta e falta di medionan financiero, mas boluntario pa yuda cu diferente proyecto y personal subsidia pa duna un miho servicio na e clientenan.
Actividadnan pa clientenan ta entre otro programanan di ehercicio manera zumba, Viva La Dona, Charla tocante biba saludabel, obra di man, dia di mama, dia di amistad etc. Pero e sosten mas grandi cu nos por duna ta door di comparti cu esnan cu tin e malesa. Yuda nan cu guia social y spiritual pa nan por carga nan malesa cu curashi pa enfrenta tur reto. Asina nos por contribui na e idealnan di Mary Joan kende a lucha te na final pa su bida y pa su prohimo.
Help support
warriors in need
Donations are always appreciated, but there are lots of great ways to get involved.
